සන් වූ කොන්ග් අපරදිගට ගිය ගමන (i කොටස)

මීට කලින් බ්ලොග් පෝස්ටුවක අපි සන් වූ කොන්ග් කියන්නෙ කවුද, එයා මොන වගේ කෙනෙක්ද කියලා කතා කලානේ. අද මම කියන්න හදන්නේ සන් වූ කොන්ග් කියන චරිතය වටා ගෙතුණු ඒ අපූරු කතාවයි. හැබැයි ඉතින් මේ පුත්තරයාගේ කතාව නම් ටිකක් දිගයි. මොකද මෙයාගෙ කැරැට්ටුව එයිතරම් හොඳ නෑ. මෙයා කලොත් මොකාක් හරි මගෝඩි වැඩක් තමයි කරන්නෙ.ඉතින් ඒ නිසා සන් වූ කොන්ග්ගේ කතාව කොටස් කිහිපයකින් තමයි බ්ලොග් අඩවියේ පළ කරන්න වෙන්නේ.  

කාලයේත් ලෝකයේත් ආරම්භයේ පටන්ම මල් සහ පළතුරු කඳු වැටියේ පිහිටා තිබුණු එක්තරා ගල් කුලක් ශක්තියෙන් පිරී ඉතිරී තිබුණා. දවසක් මේ ගල් කුල ශිලාමය බිත්තරයක් දැමුවා. මේ බිත්තරයෙන් ගල් වඳුරෙකු එළියට ආවා. ඌ ලොව සතර කොනටම වැඳ ආචාර කරලා පොඩි විනෝදයක් ලබා ගන්න මල් සහ පළතුරු කඳු වැටියෙන් පහළට පැන්නා. ආත්මාර්ථයෙනුත්, පුහු මානයෙනුත්, ප්‍රයෝග වලිනුත් අග තැන්පත් මේ ගල් වඳුරා, ඉතාමත් ඉක්මනින් වානරයින්ගේ රජු බවට පත්  වී වසර හාරසියයක්ම මේ වඳුරන්ව පාලනය කළා. නමුත් මේ මහා බලසම්පන්න රජ වානරයාට ලොකු ප්‍රශ්නයක්. කෙතරම් බලසම්පන්න කෙනෙක් වුනත්, එයා මරණයට පත් වෙනවනේ. ඉතින් අපේ රජ වානරත්, තමන්ගේ ආයුෂ ඉක්මනින් අහවර වෙන බව දැනගෙන, මරණයට මූණ දෙන්න වෙන එක ගැන බොහෙම බයෙන් කාලය ගත කළා. 

රජ වානරගේ භීතිකාව ගැන දැන ගත්තු එක් වානර උපදේශකයෙකු, රජ වානරට මෙහෙම යෝජනාවක් ගෙන ආවා. රජතුමනි, ඔබතුමාට මරණයෙන් ගැලවෙන්න නම් කරන්න තියෙන්නේ අමරණීය මහානුභාවසම්පන්න තාඕ සෘෂි සුබෝධි උත්තමයාණන් මුණගැසී අමරණීය බවෙහි රහස් උගෙනීම තමයි, වානර උපදේශකයා කිව්වා. මේ උපදේශය පිළිගත් රජ වානර සුබෝධි සෘෂිවරයා මුණගැහෙන්න පිටත් වුණා. ඒත් හිතූ තරම් ලේසියෙන් රජ වානරට සුබෝධි සෘෂිවරයා හමු වීමට බැරි වුණා. රජ වානරයා පුරා අවුරුදු දහයක් මහ මුහුදේ යාත්‍රා කරලා කරලා අවසානයේදී සෘෂිවරයාව සොයාගෙන ඔහුගේ ගෝලයෙකු බවට පත් වුණා.

රජ වානරයාගේ කට්ට වෙට්ට පිත්තල වැඩ ගැන මහා සෘෂි සුබෝධි උත්තමයාට නම් කිසිම පැහැදීමක් තිබුණේ නැහැ. ඒ නිසාමදෝ රජ වානරයාට ටිකක් විසුළු තේරුමකින් යුතු නමක් එතුමා වානරයාට ලබා දී තිබුණා. ඒ නම තමයි සන් වූ කොන්ග්. මේ නමේ තේරුම, 'හිස් බවට උපන් වානරයා' යන්නයි.ඉතින් කාලයාගේ ඇවෑමෙන් සුබෝධි සෘෂිවරයා සන් වූ කොන්ග්ට දිව්‍යමය වෙස්වලා ගැනීම් 72 ආකාරයත්, වළාකුළු මත නැගී ගමන් කිරීමටත්, සියලු දෙවිවරුන් සහ භූතාත්මයන් මට්ටු කල හැකි මන්තරත් කියා දුන්නා. සන් වූ කොන්ග්ට උගැන්වූ වලාකුළු පිනුම් ක්‍රමයෙන්, එක් පිනුමකදී මයිල 108,000ක දුරක් පැනීමට සන් වූ කොන්ග්ට පුළුවන්කම ලැබුණා. මීට අමතරව සෑම වර්ගයකම සටන් කලාවනුත් අමරණීය බව ලඟා කරගත හැකි අභ්‍යන්තර ශ්වසන ක්‍රමවේදයත් සුබෝධි සෘෂිවරයා සන් වූ කොන්ග්ට උගැන්වූවා. කොයි තරම් දේ ඉගෙන ගත්තත් සන් වූ කොන්ග්ගේ අර තිබුණු දඩබ්බරකමේ නම් අඩුවක් වුණේ නැහැ. මෙයා තමන්ට පහළ පන්ති වල හිටපු ගෝලයන්ට තමන්ගේ දස්කම් ගැන පම්පෝරි දොඩවලා ලොක්කෙක් වෙන්න ගිහින් අන්තිමේදී සුබෝධි සෘෂිවරයා අපේ සන් වූ කොන්ග් රජ වානරව තමන්ගේ ආශ්‍රමයෙන් පන්නා ගත්තාලු!